DUGANG PANGINABUHIAN, NAG-ABRI ALANG SA MGA DRAYBER SA METRO IPIL TODA PINAAGI SA RENT-TO-OWN BAJAJ UNITS

Thata Manlapaz

IPIL, Zamboanga Sibugay — Bag-ong kahigayunan sa pagpanginabuhi ang naabrihan alang sa mga miyembro sa Metro Ipil Tricycle Operators and Drivers Association (TODA) human sila nakadawat ug rent-to-own Bajaj units pinaagi sa Sustainable Livelihood Program (SLP) sa Department of Social Welfare and Development (DSWD).

Tumong sa maong programa nga mahatagan ug dugang suporta ang mga drayber pinaagi sa paghatag kanila ug mga sakyanan nga magamit sa ilang panginabuhian. Pinaagi niini, adunay kahigayunan ang mga benepisyaryo nga madugangan ang ilang kita ug mas mapalambo ang pagsuporta sa panginahanglan sa ilang mga pamilya.

Lahi sa naandan nga hinabang, ang rent-to-own nga pamaagi naghatag ug oportunidad sa mga drayber nga magamit ang Bajaj units samtang nagtuman sa kasabutan sa pagbayad aron sa umaabot mahimong ilang kaugalingon ang maong mga sakyanan.

Gilauman nga makatabang usab kini sa pagpalig-on sa ilang serbisyo sa transportasyon, ilabi na sa paghatag ug mas daghang oportunidad nga makapanginabuhi pinaagi sa ilang adlaw-adlaw nga pagbiyahe ug pagserbisyo sa mga pasahero.

Sa mensahe nga gipadayag ni Congresswoman Doc Marly Hofer T. Hasim, iyang gipahayag ang kalipay nga pinaagi sa SLP sa DSWD, nahatagan ug maong oportunidad ang mga miyembro sa Metro Ipil TODA.

Gipakita niini ang kamahinungdanon sa mga programa nga nagtumong dili lamang sa paghatag ug temporaryong tabang, kundili sa paghatag ug mga pamaagi aron ang mga benepisyaryo makapalambo sa ilang kaugalingong panginabuhian.

Alang sa mga drayber nga nagsalig sa transportasyon isip nag-unang tinubdan sa kita, ang maong suporta usa ka dakong kahigayunan aron mas mapalig-on ang ilang trabaho ug mapauswag ang kahimtang sa ilang pamilya.

Labaw sa pagbaton ug bag-ong sakyanan, ang maong programa naghatag ug dugang paglaum nga pinaagi sa paningkamot, hustong paggamit sa oportunidad ug padayon nga pagtrabaho, mas lig-on nga panginabuhi ang maangkon sa matag pamilya.